Samaaroh insaan ke jeevan mein aur sammaan ka bahut zyada mahatva hota hai. Hum ise apne dil aur apne mann se jodhte hain. Shaayad isi liye hum dushman ke sammaan par chot pahunchate hain taaki usey peeda ho. Lekin dhyaan rahein, shareer par lagi chot insaan bhool sakta hai, par uske sammaan par lagi chot usse jeevan bhar peeda deti hai.
Aurat ke maan-sammaan par lagi chot usse uss seema tak le jaati hai jahaan se sirf pratishodh dikhai deta hai. Apne dushmanon ko jitna hai to prem se jeetiye, apne karmon se jeetiye. Unhe ehsaas karwaiye ki unse galti hui hai. Kisi ke sammaan ko aisi chot na pahunchaiye ki woh aapka naash karne par utar aaye.
Smaran rakhein, kisi ka apmaan karke aapke dil ko thoda santosh ho sakta hai, par us apmaan se aap kai dilon ko aaghaat pahunchate hain aur apne liye ek dushman aur badha lete hain.
Hum sab jaldi se safalta chahte hain aur saari sampatti aur sukh chahte hain. Aise mein kai baar hum chhote raste chun lete hain jismein parishram nahi hota. In rastein mein sirf kismat ka sahara hota hai, jaise ki jua.
Jua ek aisa dal-dal hai jismein ek baar ghus gaye to servnash se pehle nikalna asambhav hai. Agar aap jeet gaye, to jeetne ki bhookh badh jaayegi. Agar aap haar gaye, to use dobara paane ke liye phir se khelenge. Manushya ko apni sampatti ke saath-saath apni manavta aur sanskriti ka bhi nash kar deta hai.
Isliye kuch paana hai to parishram se paaiye. Agar kuch jua mein jeet gaye, to woh jaldi kho doge, kyunki usme parishram nahi tha. Uski raksha karne ke liye man mein swabhavik prayaas bhi nahi honge.
Kshama badon ko chahiye aur chhote ko utpaat mein sama. Sansaar mein shanti aur sukh ka mool aadhar hai kshama. Yeh pratishodh aur shatruta ke bhaavon ko khatam karti hai. Parantu har sthaan par kshama uchit nahi hoti. Har apraad kshama karne yogya nahi hota.
Kabhi-kabhi apraad ko kshama karke hum vyakti ko aur bada apraad karne ki prerana dete hain. Jaise stri ka maan bhang karna, jismein kshama ki koi vyavastha nahi hai.
Agar ek bhumi ka gay bacha kheench le to usse kshama kiya jaa sakta hai, par agar woh narbhakshi ho jaaye, to uske sirf do upaay hain – ya to pinjra ya mrityu.
Kuch sthitiyon mein kshama ke sthaan par dand dena aavashyak hota hai. Dand ka bhay hi hai jo logon ko apraad karne se rokti hai.
Is sansaar mein sabse bada kya hai? Abhimaan aur bahubal ya vishwas aur aastha? Nishchit roop se bahubal ka mahatva hai, parantu bina vishwas ke bahubal bekaar hai.
Jo vishwas se bharpoor hota hai, woh prabhu ki sharan mein hota hai. Jab paap ka bahubal dharm ke vishwas se takrata hai, toh paap haar jaata hai aur vishwas jeet jaata hai.
Jo vyakti satya ke maarg par chalta hai aur apne isht mein aastha rakhta hai, usse koi bhi bura parinaam nuksaan nahi pahunchata. Aapne kabhi socha hai ki hamara jeevan ek retghadi jaisa hai. Jo ret neeche gir chuki hai, woh hamara ateet hai aur jo upar hai, woh hamara aane wala bhavishya hai.
Vartamaan mein jo sankuchit raah hai, wahi jeene ka ek akela pal hai. Iska upyog kaise karna hai, yeh humpar nirbhar hai. Jo beet gaya uska dukh manana hai ya bhavishya ki chinta karni hai, sab kuch karne ke liye yehi ek pal hai.
Jo vyakti apni santhaan ke liye kai kashton ka samna karta hai, uska mahatva badi baat hai. Agar wahi santhaan santap ka kaaran ban jaaye to yeh sochne yogya baat hai ki humne uska palan kaise kiya.
Agar bachpan mein bachche ke zidd ko maankar humme anand ki anubhuti hoti hai, par dheere-dheere hum unke zidd ke daas ban jaate hain. Ek galat tariqe se parivarit santhaan sukh agni ki tarah hota hai jo sara parivar jala sakta hai.
Jab zaroori ho to apni santhaan ke zidd ka virodh karein, unhe rokna seekhein. Samay rehte agar zidd ka virodh nahi kiya gaya to bhavishya mein iska parinaam gambheer ho sakta hai.
Pratigya aur vachanon ka apna ek mahatva hota hai. Jo manushya apne jeevan mein niyam nahi rakhta, uska jeevan vyarth hai. Parantu samay ke saath niyam badalna bhi zaroori hai.
Samay ke anusaar apne niyam aur pratigya ko badalne wale vyakti hi safal hote hain. Itihas aisa vyaktiyon ko kabhi kshama nahi karta jo samay ke saath nahi badalte.
Ek pakshi ko dekho jo apne ghosle ko barish aur aandhi ke baad bhi bana leta hai. Hum chhoti-chhoti asafaltaon se ghabra kar parishram karna kyun chhod dete hain? Safalta paane ke liye nirantar parishram hi ek maatra raasta hai.
Manushya ke jeevan mein satya svikaar karna bahut mahatvapurn hai. Jab tak manushya satya ko svikaar nahi karta, tab tak usey asatya se ladne ki shakti nahi milti. Jab aap bhojan karte hain to aapka pet svikarta hai ki woh bhar chuka hai, tab aap bhojan bandh kar dete hain.
Jab aapko nidra aati hai to aapka man svikarta hai ki aapka shareer thak chuka hai aur usse vishram ki avashyakta hai. Isi tarah jab aapko kisi vyasan ko rokna hai to aapko svikar karna padta hai ki bahut ho chuka hai.
Manushya apne jeevan mein vishwas par jeeta hai. Parantu vishwas kis par? Mahapurushon ki kahi baaton par, granthon mein likhe gyaan par, maa-baap ki seekh par ya apne aap par? Apne aap par vishwas karna seekho, tabhi aap jeevan mein safal ho sakte ho.
Bhakto umeed hai aap sabhi ko Bhagvan Krishna ki ye baatein ye quotes. ye Gita Gyan aapko ache lage honge. Aap sab is post ko apne dosto ke saath share kare aur comment mein Radhe Krishna likhna na bhule.
