Geeta mein Bhagwan Shri Krishna dwara kahi gayi baatein insaan ko khud se milati hain. Agar insaan Geeta ki baaton par theek se amal kare, toh na to woh kabhi asafal ho sakta hai aur na hi kisi se dhokha kha sakta hai. Geeta mein kahi gayi baatein anmol hain. Is blog post mein hum aapko Bhagwan Shri Krishna dwara kahi gayi 10 aisi zaroori baaton ke baare mein batane ja rahe hain, jinhe apna kar aap apne jeevan ko safal aur sukhmay bana sakte hain.
1. Sabse badi kamzori
Insaan ki sabse badi kamzori kya hoti hai? Dhan, prem, ya ahankaar? Nahi, insaan ki sabse badi kamzori uske raaz hote hain. Chahe aap kitne bhi takatwar kyun na ho, lekin aapke raaz hi aapki barbadi ka karan ban sakte hain. Isliye agar aapko taqatwar aur safal rehna hai, toh apne raaz kisi ko bhi na batayein, chahe woh dost ho ya dushman. Kyunki waqt ke saath kaun kab dushman ban jaye, yeh kehna mushkil hai.
2. Nakal na karein
Jeevan ki pariksha mein safal hone ke liye insaan kya kya nahi karta? Woh mehnat karta hai, koshish karta hai, lekin jab safalta nahi milti, toh woh doosron ki nakal karne lagta hai. Bachpan ki yaadein yaad kariye, jab aap exam dene jaate the toh kuch log safalta ke liye nakal karte the aur pass bhi ho jaate the. Lekin jeevan ki pariksha aisi nahi hoti. Nakal karne wala jeevan mein kabhi safal nahi hota, kyunki har kisi ke jeevan ki chunautiyan alag hoti hain, aur unke jawab bhi alag hote hain. Isliye jeevan mein safalta chahte hain toh apna raasta khud dhoondhiye.
3. Safalta aur asafalta kya hai?
Insaan ka jeevan har waqt jeet, haar, safalta aur asafalta ke beech jhulta rehta hai. Jab aap safal hote hain, toh mann khushi se bhar jaata hai, aur jab aap asafal hote hain toh dukh ka samudra dikhai deta hai. Lekin asal mein safalta aur asafalta humari soch ka natija hai. Asli haar tab hoti hai jab hum apni haar ko maan lete hain. Jab tak hum koshish karte rahte hain, hum kabhi nahi haare hote. Isliye koshish karte rahiye, kyunki jab tak aap haar nahi maanenge, tab tak jeet aapki hogi.
4. Nishkaam karm ki shakti
Aapne bargad ka ped toh dekha hi hoga. Uske beej ka akar rai ke daane se bhi chhota hota hai, lekin jaise-jaise woh ped badhta hai, waise-waise uski jadhein aur majboot hoti jaati hain. Iska arth yeh hai ki bina kisi swarth ke karm karte rahiye, aur samay ke saath aapko bhi apne karmo ka fal zaroor milega. Nishkaam karm aapko amrta ki aur le jaata hai.
5. Zyada bolna haanikarak hota hai
Hamara sharir ek anokha avishkar hai. Humein do aankhein, do kaan, do naak diye gaye hain, lekin bolne ke liye sirf ek zubaan. Kyun? Kyunki humein zyada dekhna, zyada sunna aur zyada samajhna chahiye, aur bolna kam. Zyada bolna humare liye haanikarak ho sakta hai. Isliye kam boliye aur zyada sochiye.
6. Apno ki pehchaan kaise karein?
Jeevan mein aage badhne ke liye zaroori hai ki apno ka saath diya jaye. Lekin apne kaun hote hain? Apne woh hote hain jo humein achhe kaam karne ke liye prerit karte hain, humein aage badhate hain, aur bure samay mein humein girne se bachaate hain. Jo aapko galat raaste par le jaaye, woh apne nahi ho sakte.
7. Pragati ke liye apno se door rehna zaroori hai
Jab tak aap apno se jude rahte hain, aap unki chhaya mein jeete hain. Lekin ek samay aisa aata hai jab apno se door hokar apne raste khud banana padte hain. Maa-baap apne bachchon ko har samay nahi sambhal sakte. Ek samay ke baad, aapko khud apne raste ki chunoatiyon ka samna karna padta hai. Isliye pragati ke liye kabhi kabhi apno se doori banana zaroori hai.
8. Sakaratmak soch ki shakti
Ek vyapari ka kissa hai. Ek baar ek billi ne uska rasta kaat diya, aur vyapari ne samjha ki yeh apshagun hai, toh wapas ghar chala gaya. Us din ka samay nikal gaya aur uska mahatvapurn kaam chut gaya. Raja ne uske vyapar ko bandh karwa diya. Ek doosra vyapari bhi tha jiska rasta billi ne kaata tha, lekin usne is baat par dhyaan nahi diya aur apne kaam par aage badh gaya. Raja ne us vyapari ko inaam diya. Dono vyapariyon ke saath ek hi ghatna hui, lekin unki soch alag thi. Isi tarah, jeevan mein humari soch humare jeevan ko badal sakti hai. Sakaratmak soch ke saath hum apne jeevan ko behtar bana sakte hain.
9. Apne kaam mein ruchi lena zaroori hai
Jeevan mein kabhi kabhi humein lagta hai ki din mein 24 ghante kam hain. Hum sochte hain ki kaam karne ke liye aur samay milta, toh acha hota. Lekin jo log safal hote hain, unke paas bhi din mein 24 ghante hi hote hain. Antar sirf itna hai ki woh aise kaam karte hain jo unhe pasand hain. Jab aap apna kaam pasand karte hain, toh aapko kabhi bhi thakaan nahi hoti. Isliye apna kaam khushi se kijiye, aur safalta zaroor milegi.
10. Samay ki taakat
Samay ek rait ki ghadi jaisa hota hai. Jo rait neeche gir chuki hai, woh hamara atit hai, aur jo abhi upar hai, woh hamara bhavishya. Lekin jeene ke liye hamare paas sirf yeh vartamaan ka pal hai. Agar hum is pal ko kho dete hain, toh yeh bhi atit ban jaayega. Isliye har pal ka pura upyog kijiye, khushi aur tarakki ke liye. Kyonki jo pal beet gaya, woh kabhi wapas nahi aayega.
Bhagwan Shri Krishna ki in baaton se hum bahut kuch seekh sakte hain. So friends aapko humari ye baatein achi lagi hai to comment mein Radhe Radhe jarur likhe. Saath he apne friends aur whatsapp group mein is post ko jarur share kare.
